這晚（20日）快活谷最尾第八場二班1200米又多個人開齋，此乃冠軍級練馬師告東尼，旗下冷馬「華美之友」由徒弟蔡明紹建功，告東尼取得個人今季首場頭馬，「華美之友」久休大半年復出即勝，單Win及組合獨贏A3分別派581及30元。

「華美之友」前季尾連捷於田草，之後冇再贏過，上季只曾四戰獲一亞，自今年1月18日落敗以來，一直豹隱冇再出賽，期間於今年1月18日至6月16日這五個月內，曾四次發現氣管內有大量血液或兩個鼻孔流血，期間亦有膿痰問題，入過上水雙魚河放草養生，今仗備受冷落可謂十分合理。

「華美之友」這晚久休8個月復出，跑未贏過的快活谷，告東尼準新抱即告崇恩女友莊思華（莊思明孖生姊姊）到場打氣，「華美之友」如有神助，沿途守第四位，直至拉士百幾米從中叠如飛衝上，擊敗所有對手爆58倍大冷Win，從而帶挈告東尼開齋。

至於告東尼徒弟蔡明紹，繼於9月6日憑容天鵬馬房「勇敢傳說」爆32倍冷門捧盃開齋後，今晚再在谷草增添一匹冷Win，但佢於沙田仍未開糊。

尾場跑出全晚最冷賽果，半冷「真先生」後上第二，連贏搭頭馬「華美之友」着綠燈都有267倍。三、四名分別為冷門「海翡翠」及啡燈馬「好健康」，四重彩派56萬幾，至於騎師王由潘頓以36分勝出。