林志玲前日先由北京趕返台北，參加上海世博會台灣館嘅活動，今日又要去高雄出席代言嘅浪琴表活動，非常頻撲。不過，佢所屬嘅模特兒公司凱渥前晚喺台北君悅飯店搞員工尾禡，作為一姐嘅志玲，自然現身同歡。
公司老闆洪偉明送出10幾萬新台幣禮金獎、名牌BV手袋等獎賞員工，鄭元暢同白歆惠都特別出席送禮物。林志玲更加唔手軟，即場捐出5萬現金同15萬名牌禮券，人到禮又到，大顯一姐風範，全體員工自然歡迎，除咗食飯抽獎，仲圍住一姐志玲影合照，志玲做咗佈景板絕冇詐型，全部來者不拒，任影唔嬲。
志玲除咗工作旺，緋聞一樣暢旺，佢嘅緋聞男友周杰倫噚日就為執導嘅新劇《熊貓人》喺上海宣傳，仲自嘲齣戲「蠻弱智的」，又話劇中有言承旭同曾志偉客串，冇女角就因為要避緋聞。

關穎撇言承旭約會

至於志玲嘅舊愛言承旭最近忙住做寫真集嘅後期製作，同言承旭緋聞鬧得熱烘烘嘅關穎，前晚就被發現同剪平頭裝嘅男伴喺台北睇戲食拉麪，發現有記者後，關穎起初嚇到連麪都吐出嚟，離開時黑面話：「只是朋友。」之後仲忍唔住向商場工作人員發脾氣，言承旭經理人則對關穎約會男伴事件不予回應。