恒地（012）主席李兆基（四叔）嘅細仔李家誠曳呀，佢噚日第一次以美麗華（071）主席身份主持股東會，竟然遲到，要全場小股東等佢開會，早到10分鐘嘅四叔就坐埋一邊搵獨董吹水打發時間，等阿仔到場先至可以開會！
李家誠舊年中升任美麗華主席兼行政總裁，噚日首次主持股東會，股東會中午12點喺佢哋旗下酒店舉行。
四叔好乖，開會前10分鐘已經到場，佢見未夠鐘開會，就搵獨董胡經昌坐低吹吹水先，過咗15分鐘，李家誠先出現，大夥兒隨即埋位開會，較原定時間遲5分鐘先開波。
好在小股東都冇乜點詐型，股東會順利舉行，15分鐘就散會。聞說，李家誠冇心遲到，只係喺酒店大堂俾人捉住講幾句，於是就遲咗些少去到股東會會場。

四叔：恒指3萬點有啲難

散會之後，四叔例牌評論吓股市，立法會議員就快就政改方案投票，四叔講過，如果方案過到，恒指就會升上3萬點，噚日佢似乎打定輸數，話「𠵱家政制嗰度，多數通唔過，要3萬點有啲困難。」
佢指：「嗰陣預算（政改通過）對繁榮安定有幫助，會對香港嘅經濟睇好啲，好快有3萬點，但今日睇就慢番啲，政制未得住，希望今年遲啲見3萬，如果今年見唔到，希望出年見得到。」
另外，四叔嘅世姪、即係新地（016）大股東郭氏家族長子郭炳湘最近蠢蠢欲動，又話押股融資，又斥資2億元入股方興地產（817），四叔話，對方冇搵佢合作，佢亦冇乜研究郭炳湘創立嘅帝國集團，只係睇報紙先知，將來雙方會否合作就要視乎情況而定咁話。

李華華
mailto:[email protected]