騎師潘頓有乜興趣？佢話最鍾意同太太周遊列國，其他呢？最大興趣咪贏馬做冠軍，KO韋達囉！如果周日贏埋馬會前主席黃頌顯名下馬「興趣」，就真係趣味十足，要幾趣有幾趣。呢位高手贏到唔識收手，開季三個月已經掟甩韋達成條街，各條跑道、各項路程佢都無堅不摧，呢種騎師氣勢真係唔知幾耐冇見過。潘頓季內跑田草千八米上名率超過四成，呢程特別拿手。「興趣」屢拼不逞，呢勻搵潘頓幫手，九成九想借助佢嘅旺氣同拼勁開齋，而潘頓又有機會喺拿手路程表演，可謂一舉兩得。