碧桂園(2007)預備大量餅卡畀小股東,另一邊廂,會德豐(020)主席吳宗權噚日喺股東會,俾一位小股東問到口啞啞,原因就係點心券每人限攞一張。話說股東會臨近尾聲,有位婆婆突然發難,起身質問管理層,「點解畀多張券我(換點心)都唔得?」佢話買咗會德豐好多年,前後買入兩次,所以有兩張Proxy,但班職員又唔畀攞,「你(管理層)話係咪好有趣?」
吳宗權應該冇留意呢啲事,「被訓話」嗰陣全程微笑專心聽,答咗句「我都覺得幾有趣」,之後就用眼神搵人解圍。在旁有位職員即刻幫手解釋,指多年來都唔係計Proxy派點心券,而係計一個「活生生嘅人」嚟到,就每人一張。呢位婆婆當然唔多滿意,喺台下繼續鬧。吳宗權冇理佢,繼續開會,讀埋議程,會後仲急急腳咁走,可能怕俾小股東捉住,係要佢交到點心券數啩。
掌握財經生活資訊,即Like「蘋果ATM」fb專頁啦!
http://fb.com/appledailyatm
詳情請留意明日「中環在線」