黎美言(Winkie)今日以清爽短髮造型現身荃灣，出席由佢擔正做女主角嘅電影《幻舞繩真》發佈會，男主角由大陸演員張耀天負責，另外有鬼塚及詹朗林演出。電影以街舞及花式跳繩作題材，將於廣州取景拍攝，Winkie表示事前要到廣州接受街舞及花式跳繩訓練。

今次Winkie為電影犧牲咗一把長髮，佢話喺入行初期，因公司想HotCha中一人走型格路線，嗰陣剪短過一次，直至啱啱喺青島拍完一套拳擊電影，先再一次剪短髮，佢話：「對上一套電影導演想我剪陸軍裝，我話接住部戲要跳舞，頭髮唔可以太短，不過我知道拳擊電影好似會開續集，如果再拍，我會剪陸軍裝，因為打起拳上嚟好型。」

佢仲話今年係豐收年，之前同組合HotCha舉行完演唱會，電影方面亦都有接戲，所以本來諗住獎勵自己去兩個旅行，點知到最後得個諗字，因為下半年完全冇假期，另外佢仲話要感激HotCha兩個姊妹，遷就佢嘅時間押後拍MV。

精選娛聞，喺晒《娛果》
http://fb.com/appledailyent