當年喺電影版《死亡筆記》扮演L嘅松山研一，今季佢同前田敦子合作翻拍自經典動畫《青蛙小靈精》嘅劇集，咁啱《死亡筆記》同樣開拍劇集版，更搵嚟上位男星窪田正孝同山崎賢人分別扮演夜神月同L，外界難免將兩部劇集比較。

新一集《青蛙小靈精》收視由13.1%下跌4.6%，至8.5%收視，至於《死亡筆記》就由上集嘅12.3%跌至8.7%，兩集同告收視下跌，但以《死亡筆記》輕微領先。

新劇收視麻麻，松山除咗要忙於趕戲，原來因為松山太太小雪啱啱為佢生咗第3個小朋友，現時小雪仲要安胎同專心照顧剛出世嘅囝囝，咁照顧大仔同囡囡嘅責任就落在松山身上。有消息指松山拍戲前要湊仔女返學，拍完又要趕住返去湊仔，唔好話冇時間同劇組飲杯嘢，連行街買衫嘅時間都冇，不過松山就話為咗小朋友要繼續努力咁話。