【接咗唔少登台騷】郭晉安同無綫改簽部頭合約 爭取時間練歌
張宇郭晉安部頭合約
郭晉安憑《戇夫成龍》演阿旺一角,大受歡迎,之後再演《與敵同行》嘅唐立言、《忠奸人》嘅高哲行,亦正亦邪,演技超班,不過今年安仔將會同無綫改簽部頭合約,合作咗30年,安仔除咗希望拍劇之外,自己都想試多啲新嘢,所以佢經理人合約就以合作形式簽咗俾王祖藍。
今個農曆新年,安仔去咗新加坡登台,仲同偶像張宇同台,安仔就話:「本來主辦單位係邀請我哋做嘉賓,喺張宇上台唱歌嘅時候,我就上台送花俾佢,點知張宇佢見到我,拉住唔俾我返落台,即場合唱咗一首歌!」安仔仲話:「我以前都成日聽張宇啲歌,所以對佢啲歌都耳熟能詳,今次可以喺現場聽佢唱歌,真係一種享受!」雖然安仔已經要開工拍劇,不過佢嚟緊都接咗唔少登台騷,所以都會爭取時間練吓唱歌。
其實安仔於1995年出咗專輯《一分一刻一點也願意》,之後又同容祖兒合唱《會很美》,同宣萱合唱《十萬個為甚麼》、《軟糖》,安仔都有啲自己嘅歌!
精選娛聞,喺晒《娛果》
http://fb.com/appledailyent