近年用《西遊記》做題材嘅電影都大收，搞到好多電影公司搶住拍，今年就鬧《西遊記》6胞胎。搶閘宣傳嘅有鞏俐、郭富城、馮紹峰同羅仲謙主演，鄭保瑞導演嘅《西遊記之孫悟空三打白骨精》，戲入面各主人翁嘅造型照噚日率先曝光。

鞏俐首次吊威吔

郭富城今次做孫悟空，化咗妝之後真係幾難認得出係城城，而鞏俐嘅造型就顛倒咗一直以嚟覺得白骨精係白色嘅印象，仲有啲似安琪蓮娜祖莉喺《黑魔后：沉睡魔咒》嘅女巫樣。講到特別梗係謙仔嘅藍色沙僧，成個電影《阿凡達》入面嘅潘朵拉星人咁，最實在同喺預期之內嘅要數陳慧琳飾演嘅觀音，莊嚴而穩重。反而最估唔到嘅係以小瀋陽相對纖瘦嘅外貌，被安排咗演豬八戒，佢亦係負責戲裏面嘅搞笑部份。
打鬥場面就由城城同鞏俐負責，鞏俐仲話係入行以嚟第一次吊威吔。鄭保瑞話除咗創新之外，好多《西遊記》原著故事都會加番入戲裏面，好似影片會重現「孫悟空怒打小白龍」、「觀音勸說悟空」呢啲橋段，甚至孫悟空頭上面嘅金剛圈都有古仔。
撰文：馮仁昭