由黃靜茵、朴瑞俊、崔始源同高俊熙主演嘅韓劇《她很漂亮》越戰越勇，上一集收視更升至17.7%新高，衝破20%大關在望。今晚就會播出第12集，劇組率先公開劇照造勢，可見朴瑞俊知道真正嘅初戀係黃靜茵後，同黃靜茵嘅戀情進入直路，兩人喺病床上深情對望，朴瑞俊仲將黃靜茵抱入懷中，捉起佢面珠好似想錫錫咁，畫面好甜蜜，唔知會唔會真係如觀眾所願，今集出現二人嘅初吻呢？

至於月火劇（逢周一及周二晚播出）大戰，劉亞仁主演嘅《六龍飛天》就繼續稱霸收視冠軍寶座，噚晚一集錄得14.1%，相反打對台嘅《華麗的誘惑》只有10.2%，而係鄭恩地主演嘅《無理的前進》就繼續墊底，低收3.6%。