周慧敏（Vivian）噚日凌晨2點半喺微博公佈，其經理人柯志輝（Ambrose）喺本月13日，因癌症與世長辭，終年44歲。

周慧敏官網發表公告，向柯志輝先生致謝及懷念。文中寫道﹕「於和慧敏共同進退的七年期間，柯先生重拾對娛圈的抱負。他常言道:『現在再也找不到另一個像她(慧敏)一般專業的藝人了!』。離世前他仍於病床上不停地忙著打點慧敏應國務院邀請出席巴黎活動的一切大小事宜，片刻也沒有浪費。志輝和慧敏的情誼從來不只是流水作業或純粹商業合作一般的簡單，當中他倆的付出、對彼此的信任、包容、鼓勵以至追求完美的共同理念，正正便是慧敏今天在事業上屢創高峰的背後原動力。」

柯志輝生前好友黎芷珊亦於微博悼念，佢噚晚接受記者電話訪問謂：「佢(柯志輝)係胃癌走咗，我都係噚晚睇Vivian微博先知，真係好震驚。我同Ambrose識咗好多年，以前成班朋友一齊玩，最後一次同佢傾電話，係Vivian舊年尾喺廣州演唱會。近排佢好似冇晒消息，我哋成班朋友都好奇怪，搵佢身邊人問，先知佢病得好嚴重。我哋一直都唔知佢有胃癌，佢唔想畀朋友知，唔想大家擔心。」