家陣人人都想有個靚body，健身中心亦大行其道。教育局前局長孫明揚女婿呂錦傑有份投資嘅健身中心今日開張大吉，除咗孫明揚，莎莎(178)主席郭少明兩夫婦亦有到賀，不過三位「老友記」竟然話好少做運動。主人家送永久VIP會籍畀佢哋，睇嚟無用武之地。

孫明揚72歲，少做運動都可以理解。不過，郭氏夫婦只係年過花甲，又話貪靚，好緊張自己身形，點知原來佢哋都好少做運動。郭少明最多閒時去gym room拉筋，郭太就話自己對腳唔聽話，唔做得劇烈運動。咁游乾水(打麻將)有喇啩?郭生都話:「冇呀，最多鬥吓地主咋。」

剪綵儀式尾聲，健身中心向三位送上永久VIP會籍，郭少明笑住話，自己雖然做化妝品生意，注重外在美，但強調內在美同樣重要。

其實，郭少明兩夫婦呢日以業主身份到賀，健身中心租用郭氏夫婦喺銅鑼灣嘅私人投資物業「V Point」一樓全層約7,000呎地方。

郭少明笑指，V Point全幢商廈多數租畀食肆，佢同健身中心傾租約時，見對方團隊尊業，個個身形好，佢希望有間健身中心喺度，餐廳人客食飽後，都會考慮走去做運動，順便帶動人流，一舉多得咁話。

蘋果財經，關心你飯碗
http://fb.com/appledailyatm