美國有復仇者聯盟，中國即將都有冰雪超級英雄面世，而且，當中一員是香港年輕鋼琴演奏家黃子芳（Catherine），佢化身冰雪鋼琴公主，係Stanlee工作室Stanlee pow與香港企業承興集團結合嘅作品。冰雪超英雄為迎合2022嘅冬季奧運會，將會以動漫形式出現，黃子芳是該動畫嘅獨家音樂合作伙伴，為該動漫創作中國式古典音樂。

Catherine雖然是演奏級鋼琴家，但仍會定期同老師見面傾工作計劃，佢話：「每日keep住活動後手指，希望喺屋企保持到六個鐘練習，彈琴要好刻苦，一、兩日唔彈，啲手指感覺靈敏度會差一啲，盡量希望保持多啲時間喺個琴上面。」

Catherine話：「細個時冇諗過鋼琴成為專業，但係國外國內教育制度同我哋香港唔同，香港比較多元化發展，國外好似俄羅斯，如果小朋友好想去做一樣專業，佢哋大概有五、六歲開始決定，佢哋有舞蹈學院、藝術學院、音樂學院，小學中學大學有成套教學，香港就冇咁嘅資源，變咗有啲取捨，好多小朋友三、四歲就開始學琴，但係我九歲先接觸鋼琴，當我決定行呢條路嘅時候，已經係17、18歲，人哋好刻苦嘅時候，我自己都玩緊，所以我要追返人哋嘅時間，必須要有取捨，其實係好遲，所以犧牲咗同屋企人同朋友嘅相聚時間，唯有坐喺個琴度多一啲，每日十個鐘，有幾個朋友都好理解我，一年見得三、四次，我喺香港都唔會見佢哋，因為每一日都要喺琴房，拍拖嘅時間都冇，老師成日教我有得必有失，人生要有目標有方向，暫時嘅瘋狂，可以換你一世嘅成功，佢覺得咁樣係值得，而我又好認同佢呢個觀點，我先至堅持到今日。」

Catherine慶幸成為超級冰雪英雄，佢話：「我會以漫畫形式出現，角色同我嘅職業一樣，俾我一個冰雪鋼琴公主稱號，遇到危險同突發嘅時候，就會成為冰封女俠，角色叫黃子芳。我亦係動漫嘅音樂總監，今次嘅音樂製作，五月到美國同Stanlee見面，研究應該點樣去製作音樂。」

今次冰雪超級英雄，除了Catherine還有5個角色，Catherine說：「另一個男主角會係體育界，同2022年嘅冬奧有結合點，鼓勵更多朋友參加雪上運動。」今次係個非常大嘅突破，本身我係彈古典音樂、民族音樂，今次改編嘅曲目，係將中國音樂元素、傳統音樂元素、民族音樂元，素擺落去，而希望帶一啲流行曲色彩喺入面。今次成為超級英雄化身，Catherine表示其實都有啲緊張，佢話：「角色有代表性，感到好光榮，能夠有個角色同我嘅專業結合，我覺得好新鮮。」

黃子芳有今日嘅成就，有賴佢爹哋嘅傾力栽培，Catherine話：「爹哋本身係好樸素嘅人，佢嘅終生嘅目標同願望，就係希望我哋一家人生活得開開心心，滿足到我嘅願望，佢亦都放棄咗好多嘢，好辛苦咁為係我哋屋企，爹哋係一個好簡單嘅人，佢甚至係一對波鞋著咗8年，但係我每一次演出服，佢都係買最好最靚嘅俾我，無論喺國內國外演出，佢都會陪住我，佢五線譜、一粒音符都唔識睇，為咗我會鑽研，唔同版本嘅演奏，佢o依家同其他人講嘢，好似半個專家咁。」

化妝：Annie G. Chan @ AnnieGChan makeup centre
髮型：Eric Chow @Xenter
服裝 : Whistles & Phase Eight from Rue Madame
配飾 : APM Monaco
場地：帝樂文娜公館