當年今日
關於我們

【李八方online】全港最高薪接線生 777一接電話:「我係特首」

蘋果日報 2020/03/05 21:53

工聯會建制派林鄭李八方武漢肺炎

專家都話香港抗疫做得好,係靠香港人,唔係政府。梗係啦,政府嘅抗疫工作係做乜?做接線生囉!特首林鄭月娥今日去咗工聯會做接線生,接聽嗰啲住喺大陸嘅香港人電話。你話香港抗疫係咪靠香港人先?
住喺大陸嘅香港長者的確要幫,不過政府就選擇咗用工聯會喺內地嘅服務網絡,送藥返大陸畀呢啲長者,錢就政府畀,呀唔係,係香港納稅人畀先啱。喺人都知,9月就立法會選舉,繼貼錢俾工聯會整口罩後,林鄭繼續兌現承諾,兌現佢向北京篤建制派背脊嗰份報告嘅承諾,為建制派創造「有利的氛圍」。
林鄭仲喺fb講到係政績咁樣,話自己今日去咗工聯會度打氣,順便做埋接線生,聽咗幾個市民電話,騷味十足,在場仲有曾經爆粗鬧爆林鄭嘅工聯會立法會議員麥美娟。幾十萬一個月人工就係去聽電話,八方好似啲大媽咁拎錢放入微波爐叮都無咁肉赤。
睇番林鄭自己po嗰條片,佢每次接到電話就話「我係特首」。大家諗吓,一個咩人先至會好地地有名唔用,而係會同人講自己嘅官銜,係咪好似曾相識呢?
-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架