現年33歲嘅美國名媛KimKardashian，平時好似紙板明星一樣，除咗嫁咗畀饒舌歌手KanyeWest，行行企企冇乜特別建樹。

不過佢呢鋪應該可以威番次，近日有隻用Kim姐個名推出嘅免費手機遊戲《KimKardashian：Hollywood》，自6月25日推出以嚟，一路蘋果iTunes下載成績唔錯，已過百萬人次，推出當日更加打入下載榜第2位。

玩家可以參與遊戲內一系列活動，包括開P、拍拖，仲可以同其他玩家鬥過。Kim姐接受訪問時話：「呢個計劃係好奇妙嘅經險，我好開心啲人好享受呢個遊戲。」

有投資銀行分析員DouglasCreutz係最近刊登係彭博新聞社嘅文章話，呢隻遊戲可以有成2億美元（約15.5億港元）嘅收入，佢話：「Kim嘅名氣的確會引人下載隻遊戲，但隻遊戲本身都有佢可取之處。」

有冇咁巴閉？遊戲雖然係免費下載，但好多靚啲嘅衣飾配件都要用網幣買，5千網幣就賣4.99美元（約38港元），而係遊戲入面一對鞋就要成4千個網幣，難怪發個豬頭！