英超Big 6有5隊有份踢歐聯，賴低阿仙奴斯人獨憔悴。根據黃子華嘅「魚蛋論」，對於槍迷黎講，最慘唔係愛隊冇歐聯踢，而係睇住啲對手有得踢，當然啦，如果曾經踢過兵工廠嘅球員有份亮相就更傷心。

兩位前隊長法比加斯踢車路士、華美倫仲係踢緊巴塞隆拿，而阿歷士張伯倫就半個月前去咗利物浦啦，仲有8月加盟祖雲達斯嘅門將施捷斯尼！另外3個人就比較偏喇，比錫達斯10號仔奧斯亞古比、賓菲加19歲前鋒韋洛克同埋利物浦青年軍中場伊查利亞，原來都係槍手青年軍出身，當中24歲嘅奧斯亞古比發展最好，目前已經有25頂土耳其大國腳喼帽。