當年今日
關於我們

【李八方online】公民黨「余文樂」擬撼「蔡菜子」 向鄺神下戰書鬥跳街舞

蘋果日報 2019/03/17 20:24

李予信公民黨區議會選舉余文樂李八方ONLINE

今年區議會選舉11月24日舉行,公民黨料派24人出戰,今日就率先介紹一班積極考慮參加區選、嚟自唔同地區嘅社區發展主任見傳媒,佢哋主打「公道社區」訊息,防止區議會再推動浪費公帑嘅「小白象」工程,其中最搶鏡嘅係有啲明星相、今年25歲嘅中大社工系學生李予信,阿信發言時甚有台型、自我介紹後就被在場記者包圍追訪;有記者問佢有冇被人話似邊個明星?略帶怕醜嘅阿信回應「余文樂」,但佢自言唔覺自己靚仔,只係對眼好大,睇落幾精神咁囉。
2016年立法會選舉時幫過陳淑莊喺港島區助選嘅阿信,去年底加入公民黨後,一直拍住「師傅」鄭達鴻喺「紅區」北角開展地區工作,佢話決定投身社區工作實踐理想,係受到老師、中大教授陳健民影響,透露學期內最高分嗰科就係陳健民教嘅「民主與社會」。阿信正積極考慮喺民建聯蔡素玉嘅地頭、福建人聚居嘅錦屏選區出戰;但有地區消息話蔡菜子可能喺年底交棒,「余文樂」惡鬥「蔡菜子」嘅戲碼未必會上演。
講返阿信,原來佢仲有另一個身份,就係「街頭舞者」,曾喺唔少地區公開表演,去年12月更喺中大首屆街舞比賽中贏得冠軍,最擅長跳霹靂舞(Breaking)。對於政壇另一知名「舞者」、近年已轉型做愛情小說作家嘅白鴿黨鄺俊宇嘅舞藝,阿信不諱言「有機會我都好想同佢較量一下」,佢話鄺神對霹靂舞都好有認識:「佢喺十幾年前已經有呢個水平,我係好欣賞」,強調而家好多街舞技巧都可以喺網上睇片學到,唔似得鄺神嗰個年代要睇錄影帶去學喎!
-------------------------
《蘋果動新聞》訂閱新世代,4月開始免費訂閱,現在接受登記!
http://bit.ly/2Ja3IXw
-------------------------
全港打工仔特約:Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2IZA8Ef
empty
積極考慮參加區選、嚟自唔同地區嘅公民黨社區發展主任今日見傳媒,強調要建設「公道社區」。林俊謙攝
empty
鄭達鴻(右)出道時被形容為「小鮮肉」,估唔到佢嘅徒弟阿信(左)同佢一樣顏值好高。李予信Facebook圖片