喺意大利舉行嘅無家者世界盃曲終人散，香港嘅曙光足球隊今次成績麻麻，踢13場輸9場，喺48個參賽地區中排40，比上年排24明顯退步。今次曙光隊首度有南亞裔無家者加入，仲首次由傑志教練領軍，但一手搞起呢隊波嘅社區組織協會幹事吳衞東就冇帶隊，留守喺香港大本營同球員越洋打氣。

香港費Sir冇帶隊

阿東外號係少年費格遜，今次成績差強人意，唔通同「費Sir」冇隨隊出發有關？阿東話，香港隊表現其實唔差，不過有啲以前係魚腩嘅球隊，好似法國、美國咁，今年有少少「出術」，請咗啲打U21（21歲以下國家隊）嘅球員壓陣，實力大增。原來呢啲球員季尾轉會期間可以當成失業，符合homeless定義，可以出賽。
不過阿東話香港贏咗日本13:2，都算係「光復釣魚台」，有個交代。佢哋仲爭取緊2012年或2014年喺香港主辦無家者世界盃，有興趣幫手或贊助，可以去呢個網睇睇 http://soco-wofoo-homelesssoccer.hk。