港姐出身嘅陸詩韻，原來屬外柔中剛型，佢早前喺電影《辣警霸王花2不義之戰》中演霸王花，需要陀槍出動，佢竟然對開槍一試難忘，仲上埋癮㖭，近日相約朋友去考槍牌，佢仲好叻豬咁一次就pass，恭喜晒！

陸詩韻好鍾意挑戰高難度，佢拍戲開槍開上癮，所以就下定決心要考到槍牌，佢今日接受《蘋果》訪問時話：「我學時問過教練，佢話有牌後，可以去菲律賓燒槍。」咁佢就喺日前約埋五、六位槍友去考槍牌，佢哋接受考官一系列指示，陸詩韻話：「考槍牌唔算好難，主要考驗我哋安全意識，神智係咪清晰，考試時有個響鬧鐘放喺度，限時要學員做晒連串指令，我都少少騰㗎。因為限時如果當中指示做錯，考官會立即叫停，咁就會『肥佬』，我射靶時都有一、兩槍miss咗，好彩最終都合乎資格。」

應考當日，陸詩韻着咗紫色運動裝上陣，咁啱又分配到紫色槍，佢話：「我哋玩上癮，仲會同朋友周圍買裝備。」問到陸詩韻玩埋啲咁男仔玩意，怕唔怕太man嚇走身邊追求者？佢話：「如果係都冇辦法 ，咁我做埋佢個角色，如果對象強唔過我，我都唔會考慮，所以擇偶，對方一定要強過我。」

更多娛聞，喺晒《娛果》
http://fb.com/appledailyent