【被後浪冚過…】傾約「最好你情我願」 談泉慶爆杜琪峯常Call飯局

蘋果日報 2017/09/20 00:01

杜琪峯保齡潘嘉德談泉慶御用警司
    談泉慶，無綫「御用警司」，上回講到佢演警察次數多到數唔到，出街會有人驚咗佢；但到1998年卻離開無綫，有傳當年係因為無綫唔再續約，談泉慶坦承：「啱，因為嗰陣時多新人、多年輕人，我哋算老一輩，佢哋話不如改一改個合約好唔好，我話算啦，唔緊要，冇所謂，唔好大家勉強，做呢啲嘢你情我願最好，我又唔係等住開飯。」
    之後談泉慶去咗製作公司做幕後，2010年轉去洲立影片發行做顧問，到2013年談泉慶發現自己有三高，於是正式退休，專心調理身體，加上佢對仔女已經投身社會，佢要顧慮嘅事冇咁多，所以談泉慶o依家得閒打吓保齡，生活優哉悠哉。
    談泉慶話：「自從發現三高之後，我飲食真係control得好，最緊要開心。我奉勸啲新人，自己保養番個身體，唔好咁拼搏，因為有健康體魄，你先至能夠做到個角色入木三分；你冇健康體魄，真係好難應付好艱巨嘅工作。」
    談泉慶係1975年無綫第4期藝員訓練班畢業，同杜琪峯、黃杏秀、李國麟及無綫監製潘嘉德等係同班同學，眼見潘嘉德做咗名監製，杜琪峯更加係著名導演，但自己咁多年嚟都係做綠葉，會唔會覺得鬱鬱不得志？談泉慶話：「唔會，TVB好好，量材而用。我哋第4期成日有聯絡，杜Sir好好，得閒冇事就call齊我哋出嚟食飯，所以我哋第4期好close。」莫非冇諗過做男二或者男主角？談泉慶就話：「隨緣啦，有時啲嘢唔到你諗。」
    退出娛樂圈多年，問談泉慶有冇興趣再返幕前拍嘢？佢坦言：「有，我成日同杜Sir講，我o依家every time都ready，同學仔怕乜坦白講？」
    不過，談泉慶想現身嘅並唔係公仔箱：「但電視我又唔想返去喎，因為電視時間比較長，同埋我拍電視拍咗20幾年，時間真係顛倒得好犀利，變咗作息時間好少。」唔知杜琪峯嚟緊開新戲，會唔會預埋呢個同學仔一份呢？
    採訪：戴彩煥
    攝影：沈健程
    攝錄：馮嘉銘
    empty
    （攝影：沈健程）
    empty
    拍《乘風破浪》嗰陣，談泉慶未有「二撇雞」。（截圖）
    empty
    1978年播出嘅《倚天屠龍記》（即係鄭少秋主演嗰個版本），都有談泉慶（右）份。
    empty
    到1980年嘅《上海灘》，談泉慶同周潤發有對手戲。
    empty
    真係有台型㗎！
    empty
    到1996年播出、由黎明主演嘅《今生無悔》，都見到談泉慶（右）。（劇照）
    empty
    談泉慶拍過唔少電影，不乏佢演警察角色。（《暗渠》截圖）
    empty
    1995年「無綫二十年服務獎」頒獎禮上，談泉慶獲頒紀念品。（資料圖片）
    empty
    同六叔邵逸夫好好傾（資料圖片）
    empty
    仲有時任無綫電視廣播業務總經理何定鈞（資料圖片）
    empty
    睇番談泉慶啲舊相，其實多年嚟唔算變化好大。（資料圖片）
    empty
    談泉慶話同當年藝員訓練班仲係好friend，杜琪峯更不時約飯局。（談泉慶提供圖片）