敏之話:「以前讀書都有做partime model,多數放學後會着住校服去casting,咁成身拎住好多嘢,又包又衫。有次坐港鐵好逼人,突然覺得後面好涼,感覺到有人揭我裙底。當時真係好想喊,面都紅晒,我就發咗癲喺度嗌,原本咁逼嘅環境下,大家都可以再退一步,但就冇人敢認。」之後敏之就衝出地鐵,由於唔知道邊個係「變態佬」,就一路喊住返屋企話畀屋企人聽。而呢次事件後,佢都有陰影,佢話:「一世都記得啦,o依家搭地鐵都會黐牆企,同擺個狠樣出嚟。」所以佢絕對贊成設立女性車廂,同鼓勵女生學防狼術,並會教導囝囝雷冬至學習正確嘅性教育知識。