朱智賢噚晚喺屯門出席一個倒數活動，佢着咗一條白色短裙、大露背、心口仲有少少低胸，記者大讚朱智賢好性感，問到佢係唔係真空？佢就問番記者咩係真空，於是要直接問佢有冇戴bra，佢就話：「冇啊，都想戴嘅，但露背都冇理由戴bra。」講到噚晚有冇約緋聞男友謝東閔，佢就話冇約佢，至於套咁性感嘅衫，有冇俾謝東閔過目過先着，佢就話：「冇啊，佢睇報道睇到咪由佢囉，其實都冇咩嘢睇，我喺《三日兩夜》咪仲性感。」

日前朱智賢就喺社交平台話自己撞到人哋部車，佢就話：「其實好好彩，都係撞到人哋車尾少少，好彩我自己唔係高速撞埋佢，車主落車都話算數，不過車主太太就有啲緊張，始於女人都係比較計較，仲叫我以後小心啲。」講到之後會唔會叫謝東閔車佢，佢就話：「我覺得我揸車好過佢。」

問到會唔會同謝東閔交換聖誕禮物，佢就話係講金唔講心，咁快將個心畀咗佢？朱智賢即話：「遲啲先啦。」

更多娛聞，喺晒《娛果》
http://fb.com/appledailyent