今晚電影《我的早更女友》喺太子豪華戲院舉行特別場，又係呢幾位「鐵腳」，包括黃夏蕙、艾美琦(Amy)、Naomi同前亞視藝人王煒等等。見到夏蕙B，自然要問問佢大年初一有乜嘢搞作。夏蕙B話都係一如以往，去黃大仙上頭炷香:「十幾年如一日，但唔會叫啲仔女去喇，佢哋都好忙。」

年年夏蕙B上頭炷香個look都成為焦點，今年又如何？夏蕙B原來一早諗咗:「今年會扮羊，仲搵咗羊頂帽，逐粒逐粒鑽石黐上去，羊年一定襯番。」佢話農曆年會留港，因為好忙，要等到母親節先至出埠去三藩市登台，分享做母親心得。咁會唔會約埋老友祥嫂過年？夏蕙B笑笑口話:「年卅晚已經約咗佢啦。」

講到話早前夏蕙B於fb上暗示有意參選，仲笑言唔好要「私煙」，網民紛紛力撐，但之後就再冇下文。問番夏蕙B，佢話:「我仲要諗下先，睇下有冇人搵我，唔講咁多喇。」

之後輪到Amy受訪，離奇地拉埋王煒一齊做訪問。原來Amy話佢呢排忙於錄歌，因為佢想出碟，但錄極唔好聽:「咁啱我遇到王煒姐姐，佢把聲好好，高音甜低音準，好想佢收我為徒。」

王煒當下即送番頂高帽俾佢話:「Amy真係有天份，而且勤力，唱歌呢，我就邊學邊唱，一齊學啦。」本來都正正常常，豈料Amy突然露出「真面目」問王煒:「會唔會同我一齊出寫真？」下？

王煒當下即耍手擰頭sayno，Amy當然都唔係預對方會肯0架啦，佢都係旨在搵位講自己嘢啫:「公司想出男性寫真，我要幫手搵啲高大威猛嘅男仔。」講講下又同王煒講:「不如幫手一齊物色，仲有靚仔睇添!」王煒即話:「暫時唔使，我做好我嘅音樂先。」Amy都係搵位講佢想講嘅嘢啦，話其實已經搵到個，仲話遲下帶出來俾大家見喎。(採攝:馬建華)