當年今日

Sports Network:
拿度變啤神

蘋果日報 2013/05/07 00:00


好多運動員得閒冇嘢做,都鍾意賭番兩手。積極備戰5月底法國網球公開賽嘅西班牙「泥地王」拿度,近兩日都不停喺facebook上載,自己賭啤嘅相。喂,咁爛賭,小心玩物喪志,搞到法網出事呀!
替賭博網站宣傳
話說日前拿度練完波,返到酒店休息;不過方法與眾不同,竟然上網玩德州話事啤,仲參加咗比賽㖭!之後出街食晚飯都機不離手,唔用laptop咪用電話玩囉。齋睇呢兩張相,佢爛賭程度同喺澳門葡京,賭到唔肯走嘅爛賭二有得揮!
成日咁上網玩啤牌,會唔會玩晒今年賺到嗰225萬美元㗎?不過,原來佢係幫賭博網做宣傳,所以好有可能唔使自己畀晒錢。拿度仲拍過廣告話自己練完波沖緊涼,都上網同喺圖書館用電腦嘅人賭錢,懶係方便咁。Idea係唔錯,不過意識就唔多好囉。
佢周一一早就喺馬德里一個泥地場練波,為馬德里大師賽做準備。休息期間仲同教練檢討,個樣好鬼認真,睇嚟26歲嘅拿度都識得「工作時工作,遊戲時遊戲」呢個道理。泥地王周三就會落場比賽,呢兩日好專心練波啦。
empty
馬德里練波