【果燃上架】LEGO瀕臨破產又重生 竟被指心狠手辣同靠抄襲?
編輯推介 果燃台
Your browser does not support the video tag.
行過深水埗福榮街,一堆堆玩具擺晒出馬路,小編個仔手指指兼大叫︰「係LEGO呀!」睇過?賣咁平嘅?一盒盒遠看分不清是樂高還是樂拼嘅積木,oh sorry,小編老花,係樂拼呀!真係蘇東坡話齋︰橫看成嶺側成峯,遠近高低各不同。睇嘢真係要睇全面啲好。
果燃台新上架《積木砌出一片天》Lego : The Golden Bricks 話你知LEGO點樣由一塊膠積木煉出片地黃金。LEGO能夠做到俾人抄、俾人跟風,就證明佢做到一定嘅高度。咁LEGO又有幾把炮先?LEGO本來係丹麥一個小城鄉「比隆」嘅產物,喺2017年,呢個小鎮仔亦只得約6,300人口,少得可憐,卻地靈人傑地生產出LEGO這個舉世知名的品牌——一切始於1934年,本身係木匠嘅創辦人基斯甸臣(Ole Kirk Christiansen),平時成日整玩具畀仔仔玩,有一日,佢因利乘便創辦咗LEGO呢間玩具積木公司,名稱源自丹麥語「Leg Godt」,亦即係「開心玩」嘅意思。
之後嘅LEGO(我哋暫時唔講「暗黑」歷史住,容後輕述),就係你我他小時候嘅集體回憶,令我哋度過咗一個「開心玩」嘅童年歲月。無論你係男仔定女仔、無論你有冇收過一盒完整嘅LEGO玩具作為禮物都好,小編敢寫包單,你一定砌過佢——70年代、80年代、90年代,LEGO系列風靡全球,細路玩,大人玩,趣緻又過手癮,益智又考腦筋——當年曾經的香港區slogan「樂高多創意,件件考心思」,乃係虎媽虎爸為求啟發仔女創意思維、及早培育升大學之路的必殺課程之一。
但風光嘅背後,一切又有如我們的蔡楓華之神預言︰「剎那光輝唔代表永恆。」無人諗過叱吒風雲嘅LEGO,喺千禧年附近,遇上咗專屬於佢哋嘅積木海嘯——2000年虧蝕達1億歐元(約港幣10億),3年後虧蝕更提升至近2億歐元(約港幣20億)。點解?因為LEGO從來無注意到電視遊戲(TV Game)所掀起嘅風潮(But Game的風~~)。假如LEGO想「停住這風Oh Baby」,LEGO就需要拋低過去一切,攬炒、洗牌、焦土之後由頭到腳重新變革。
於是,2004年,LEGO的基斯甸臣家族(Christiansen),首次引入第一位非家族成員——勞斯托普(Knudstorp),作為LEGO的CEO。(2016年功成身退)
勞斯托普,其實都OK靠譜嘅(靠譜——北方用語,「離譜」嘅相反,靠得住嘅意思)。佢上任後,10年間,令LEGO嘅營業額增長達4倍,至近40億歐元(約400億港幣)。嗱我哋並唔係造神,我哋只係謙卑地學嘢,一齊嚟睇吓勞斯托普點樣化腐朽為神奇——更改所有LEGO嘅外盒設計、維持LEGO「崇尚創意任人砌」嘅初心、與Barbie、Star Wars、Batman、Spider-Man、美國隊長等著名品牌推出crossover聯乘別注版,集天下英雄於一身。 更重要嘅係,LEGO着重免費宣傳,支援各地Kidult玩家(大唔透嘅成年人)舉辦LEGO展覽。就係呢班為數眾多嘅成人LEGO迷,令LEGO不費一兵一卒一花一草一毫子一廁紙,達到宣傳嘅極緻功效,重新爬升成為全球玩具業界、積木業界一哥。
我哋熱切歡迎LEGO來回地獄又折返人間。而喺片裏面,仲有一句旁白係咁講嘅︰「微笑人偶背後,係一家靠訴訟、無情地擊敗對手的跨國企業」。微笑人偶,指的是LEGO經商標註冊的公仔( Minifigures );而企業,指的是LEGO本身。 係嘅,LEGO的經歷有如滄海桑田、大起大落。而喺2017年,LEGO也曾控告過一家中國公司「博樂」(BELA)侵權,最後汕頭市中級人民法院判樂高集團勝訴。呢一次,係LEGO第一次喺中國針對仿冒產品生產企業訴訟之中獲得勝訴。小編知道,喺大陸打官司真係難如登天,有些時候,天都算有眼嘅,並唔係話「NEW把LUN」一定打得贏「NEW BALANCE」嘅,我哋相信一吓正義好唔好?
不過,當一家獨大,霸權就會出現。大家有冇發覺,市面上除咗LEGO之外,其他積木品牌並不多見?這是因為,那個像永遠對住你笑的樂高微笑人偶,背後會提告某些積木品牌侵權。
人生何在逞英豪,天理人情只要公。對,我們不能否認勞斯托普執掌時期、LEGO反底的故事,這是公道,但是LEGO控告別家公司的故事,我們也要天眼恢恢疏不漏,一視同仁,勿搬龍門,否則,也許與我們的鄰居無異。
LEGO的競爭對手、同樣製作積木玩具並作銷售的Best-Lock,似乎係抵抗LEGO積木霸權的積極先驅者之一。其CEO托斯坦基拿(Torsten Geller),指出LEGO的原型根本就是抄襲——抄自1932年成立Kiddicraft的希拉莉比治(Hilary Fisher Page)之創作。嘩!嗱!小編戴定頭盔先,我哋並無作出LEGO抄襲之陳述,我哋只係作出LEGO被指抄襲之引述,你睇片就也許真相大白了。(片段中Best-Lock CEO 托斯坦基拿(Torsten Geller)作出之指控,僅為其本人意見)
又行過深水埗福榮街,一堆堆玩具繼續擺晒出馬路。今次係樂高定樂拼?還是小朋友眼利,一瞥而看穿,然大人卻執迷其中。查實呢個世界,你抄人,人抄你,有人指控LEGO抄人,今日就輪到LEGO俾樂拼抄。六道輪迴,誰作得主?大家之所以不識盧山真面目,只緣你我都身在此山中啫。
-----------------------------
第三屆最港電影大獎
按此立即投票 -----------------------------
【武漢肺炎】專頁 全民自救 抗疫資訊盡在《蘋果》
呢度係位於法國嘅LEGO專營店,永遠都人頭湧湧,真係賺到笑。
LEGO同好多唔同品牌出crossover,好似STAR WARS咁,留意左下角價錢牌,$4000幾港紙一盒架!
《少年賭神》有句對白話︰「一個人好似成日望住你笑,笑到你心都寒埋……」嗱對白嚟嘅啫,LEGO公仔望住我笑,我係唔會心寒嘅。
LEGO創辦人基斯甸臣(Ole Kirk Christiansen)嘅全家福
今集會帶大家深入LEGO總部及廠房,聽講唔容易入去架。
呢度有幾曾樓咁高嘅LEGO,唔好嚇親,片段裏面有提到,一個聖誕節就賣晒架喇!
第一位非來自創辦人基斯甸臣家族(Christiansen)嘅CEO——Jørgen Vig Knudstorp,人稱JVK。第一位非來自創辦人基斯甸臣家族(Christiansen)嘅CEO——Jørgen Vig Knudstorp,人稱JVK。
作為LEGO競爭對手,玩具積木公司Best Lock 品牌經理Torsten Geller一直嘗試打破LEGO的壟斷。
英國公司Kiddicraft製作的膠製積木,由兒童心理學家Hilary Page設計和擁有專利。比LEGO更早推出。
Kiddicraft積木。你話佢似唔似LEGO?或者睇完片,觀眾自有答案。