劉翁同王貽興早前為馬來西亞電視台自編自導自演懸疑電視劇《陽關道》，最近被Netflix睇中，嚟緊22號就會正式上架。

《陽關道》搵嚟好戲之人詹瑞文、艾威、陳國邦同江若琳等演出，故事以紙盒藏屍、伊利沙伯大廈花槽雙屍案同淘大花園無屍謀殺案三大香港奇案貫穿。8月嗰陣，電視劇已經喺馬來西亞首播，反應已經好好，劉翁同王貽興原定想搵ViuTV喺香港播映，可惜因為太血腥，最終無緣喺香港出街。

劉翁日前接受《蘋果》電話訪問嗰陣話：「我哋有畀電視台睇過，但過唔到香港電視條例，佢哋同我哋講『如果要打格仔或者改過啲劇情，對你哋嘅創作唔公平』，咁我哋都好理解。」劉翁仲話劇中有唔少肢解、殺人、劏屍嘅場面，所以都有晒心理準備香港播唔到：「馬來西亞嗰邊嘅部門，類似我哋香港嘅廣管局，但係寬鬆好多，所以就冇刪剪咁出到街。之後，Netflix嗰邊嘅聯絡人同我哋講好鍾意個故事，外國人係唔會理演員出唔出名，真係睇演技同故事，仲容許我哋一個鏡頭都唔使剪就出街。我好開心，坦白講，呢個劇入面，唔係香港一級嘅演員，Netflix好公道咁去睇我哋嘅作品，我哋成個團隊都好畀心機做，有人賞識，真係好開心。」

《陽關道》咁受歡迎，劉翁透露已經籌備緊第二季，預計明年年中開拍，不過就唔會原班人馬演出：「我哋會照舊用香港奇案做主軸，但人物方面就會換新嘅演員，就算上季嘅人出現，都未必佔好多戲。最希望梗係長拍長有，拍多幾季啦。」

精選娛聞，喺晒《娛果》
http://fb.com/appledailyent