張振朗、蔡思貝、劉佩玥同何廣沛今日喺上水出席「聖誕星空夢派對」，對於張振朗喺Ig留言指自己過咗一個唔平安嘅平安夜，佢被商場嘅帳篷擊中，整傷左腳膝頭同背脊(新聞連結： http://bit.ly/2BBehus )，佢今日撐住爬山杖行出台，見佢一步一步好小心翼翼，佢喺台上話：「好唔好彩整傷咗，o依家彎唔到腰，但慶幸就係冇傷到個樣，如果唔係都要退休，我驚由偶像派轉去實力派，我做唔到。」身旁嘅蔡思貝即話：「好彩你冇傷到個樣，你真係靠樣。」之後佢同其他演員就坐喺台下，當要上台唱歌嘅時候，何廣沛同劉偑玥都幫手扶住佢，篤住爬山杖嘅張振朗笑住話：「今日好似四哥，企得好直。」

訪問時，張振朗憶述當時情況，佢話：「我、謝東閔同另一個朋友去食嘢，去到一個地方，朋友大叫『小心呀，走丫！』，我未會意到係咩事，喺天台就有3個帳篷跌落嚟，撞到我條腰同膝頭哥，我瞓咗喺地下10幾分鐘都郁唔到，我好唔開心，最擔心係影響《包青天再起風雲》嘅工作，因為我為咗『展昭』呢個角色，之前操咗幾個月，但o依家因爲一個意外，我覺得好唔開心同遺憾，應該有人要負責，如果我同姪仔一齊，同樣事情發生，件事係可大可小。」會追究責任？佢話：「稍後研究，o依家睇番健康先，今晚我都要開廠，但因為我彎唔到腰，所以打唔到，今日出活動我都要戴腰封，好似四哥，噚晚隻左腳郁唔到，今日郁到，但要戴護膝。」

張振朗表示醫生已幫佢照過X光，好彩冇碎骨，但一星期後要覆診，佢仲指場地負責人有聯絡佢家人跟進。傾賠償？佢指事件會交由家人處理。不過佢最擔心係工作，佢話：「《包青天再起風雲》開咗4日，原本聽日要拍打戲，今晚要同監製傾下。」怕唔怕易角？張振朗表示：「擔心，你睇我o依家都出晒汗，但留待公司決定。」問到要幾耐時間康復？佢話醫生冇講，但o依家有做物理治療同冰敷。」女友陳芷尤有冇關心佢？佢話：「有，但佢當時唔在場。」平安夜唔係一齊過？佢有啲尷尬咁笑住話：「各有各忙，我開始發現自己鍾意男人。」怕唔怕腰傷變成舊患？佢苦笑表示：「好驚會影響生育能力，我唔想。」身旁嘅蔡思貝示意話做張振朗替身，因見到對方為角色而努力，唔瞓覺要狂操，張振朗笑對方係「女版成龍」。

蔡思貝指新一年「要去死皮，重新開始」，事後佢笑住話：「近排冇乜是非同緋聞，希望keep住，2018年注視番我嘅工作上。」問佢今年係咪過單身嘅聖誕節？佢直認不諱：「係呀，（開單身派對？）我同愛我嘅家人一齊過。」

更多娛聞，喺晒《娛果》
http://fb.com/appledailyent