曾參選《PRODUCE 101》男團版嘅林煐岷、金東賢，落選後組成男團MXM，於本月6號正式喺韓國出道。MXM日前出席apm商場活動後，噚晚喺九展Music Zone舉行出道派對。不過由於Music Zone不設坐位，粉絲為近距離見偶像都不停向前逼，主持人及MXM都多次提醒粉絲退後。

派對準時晚上8點開始，MXM率先現身勁歌熱舞《Welcome To My Hollywood》及《Just Come Out》炒熱氣氛，台下粉絲尖叫聲拆天，隨後兩人以廣東話「大家好，我哋係MXM，好開心見到你哋」向粉絲打招呼。被問到準備新碟《UNMIX》時有冇發生咩印象深刻嘅事，金東賢表示：「有一日休息去練習室搵其他人時，突然有一名哥哥唔小心打爛咗隻杯，韓國亦有一種類似『落地開花，富貴榮華』嘅講法，所以都係一種好意頭。」而花名係「小羊駝」嘅林煐岷就應粉絲要求，表演自創嘅「羊駝舞」，獲粉絲大讚可愛。

之後MXM抽出6名幸運粉絲上台玩估歌仔，要MXM唱廣東話當然有難度，不過MXM亦盡力唱出自己聽到嘅歌詞及旋律，而粉絲亦相當厲害估到係《長相廝守》、《矛盾一生》、《風山水起》等歌曲，勝出嘅粉絲就得到與MXM合照嘅機會，令台下粉絲相當羨慕。及後播出嘅VCR中，MXM大晒廣東話，除咗「我愛你」向粉絲示愛之外，金東賢更試講急口令「入實驗室撳緊急制」，林煐岷就指聽人講喺紅館開騷要講「山頂嘅朋友你哋好」，依家要學定希望未來有機會用到。

表演主打歌《I’m The One》後，MXM喺粉絲預先寫定嘅紙條上，揀出想回答嘅問答或者聽粉絲要求，當中林煐岷即席Rap歌曲《1 Out Of N》，金東賢就清唱《Whatever You Do》。日前出席活動時指最想去尖沙嘴嘅林煐岷，表示前晚完成工作後實現願望去咗尖沙咀，大讚香港夜景好靚。之後就玩二揀一選擇題，MXM要估粉絲嘅心聲，其中「愛情VS友情」中，林煐岷揀咗友情，反而金東賢揀咗愛情，令粉絲猜測唔通金東賢戀愛大過天？最後成為輸家嘅金東賢就被罰跳《I’m The One》嘅兩倍速版本，不過抵不過粉絲嘅起哄，林煐岷亦跳埋一份。

MXM再獻唱《Being Objective》及《Good Day》後，派對亦接近尾聲，大會推出粉絲準備好嘅蛋糕，慶祝MXM出道以及補祝金東賢本月17號嘅19歲生日，粉絲更用韓文唱生日歌為偶像慶祝，令MXM大表感動，與粉絲影大合照後，MXM逐一與粉絲擊掌。