當年今日
關於我們

【咚撐!咚撐!】徐淑敏率老公同囡囡舞獅送猴迎雞

蘋果日報 2017/01/28 00:30

黃浩徐淑敏舞獅

新春伊始,大年初一,徐淑敏(Suki)首先同《蘋果》讀者拜個年:「新年快樂!萬事勝意!身體健康!《蘋果》祝大家雞年進步,花開富貴!」
Suki同老公黃浩(Kenny)家有三寶,分別係6歲多嘅心瑤(Vianna)、5歲多嘅心柔(Renee)同2歲多孻女沁誼(Isabella),連埋同住嘅Kenny媽咪同姐姐,Kenny話全家過年人氣特別旺。
Vianna性格乖巧,Renee就鬼馬,Isabella文靜,三姊妹今年原本孖住舞獅賀新歲,可是拍攝當日,Isabella太攰覺覺豬,得番大家姊Vianna同二家姐Renee,佢哋揀咗大細獅頭,一人舞一隻好精靈,喺屋企嘅花園走嚟走去,媽咪Suki打鼓畀拍子,Vianna後來希望同爹哋Kenny合作,所以一家四口就齊齊玩,非常有默契,愛犬小白都要去過來玩埋一份。兩姊妹舞完獅,還輪流向爸媽拜年逗利是,Vianna比較淡定,隨口即講出恭賀話,o氹得爸媽大利是,Renee比較怕醜,竟然「講不出聲」,不過爸媽一樣照畀大利是。
Suki接受《蘋果》訪問時話,兩個囡囡都係第一次嘗試舞獅:「佢哋玩得好開心,平時喺學校,老師有教佢哋新年寫吓揮春,同做吓利是封,學校教得好。」Suki為囡囡穿上的賀年裝,佢話唔會年年買:「三姊妹,一個接一個嘅,環保啲,細細妹就最多衫,平時我好少買新衫佢哋,姑媽買最多,印象中我買唔多過十件。」Suki自問對囡囡好嚴格,佢幽默咁話:「你哋啲花絮睇到我好惡啦。」
對於向父母拜年時,Renee口啞啞,Suki笑言:「佢唔係食螺絲,佢直情係講唔出口。」相信Renee恭賀說話一定在心中,Suki即踢爆:「佢怕陌生人。」雞年佢哋全家會離港飛日本行大運,Suki話:「我就好鍾意香港過農曆新年,但老公屋企習慣避年,妥協咗,所以開咗年,初三先出發。」