呢個彩虹獎抄足美國電視界每年一度盛事艾美獎（EmmyAwards），獎項分為戲劇、紀錄片、音樂節目、動畫四大類，之下再細分獎項，當中梗係唔少得最佳男、女主角、最佳導演、最佳編劇等。徐小明話，彩虹象徵和平橋樑，可以跨越國界，希望呢個獎項能夠加強亞洲區嘅電視人才交流。
搞個咁大堆頭頒獎禮，開支要1,300萬元。錢從何來？當然又係攤大手板問政府，由成立一年半嘅創意香港辦公室撥款。不過，徐小明話條數已經俾政府左縮右削，最終只係批咗500幾萬元，餘額要自己搵商業贊助。佢又話獎項一定唔係小圈子豬肉獎，會由各地區派出權威人士擔任評判喎。
除咗贊助A貨艾美獎，創意香港亦撥款500幾萬畀國際唱片業協會香港分會，出年3月23日舉辦首屆亞洲流行音樂節。協會主席吳雨話中、港、台三地連同日本、南韓、馬來西亞、新加坡總共七個國家地區，到時會派出頂尖新星歌手嚟香港參賽，再選出一位星中之星嘅超級超新星。另外仲設最佳舞台表演同最佳歌曲演繹獎。