英國神級講波佬John Motson喺今個球季之後將會退休，結束效力《BBC》50年嘅生涯。

今年已經72歲嘅John曾經以講波佬嘅身份參加過十屆世界盃、十屆歐洲國家盃，仲出席過29屆英格蘭足總盃決賽，粗略估計生涯喺電視台同埋收音機，講咗超過2,000場波。John Motson喺球季完結前會搞個farewell tour，當中會講18場英超，另外亦會出席電視台嘅英足盃決賽節目。

John Motson雖然已經講過超過2,000場波，不過原來有一項大家成日掛喺口邊嘅比賽，係呢位殿堂級講波佬從來未講過㗎，呢個比賽就係歐聯。因為《BBC》咁多年嚟嘅營運資金，都唔足夠同其他電視台爭歐洲賽嘅播映權，令到佢一直都無呢個機會。John Motson亦都話，如果有得俾自己揀一場未講過嘅波嚟講，佢會揀一場已經差唔多20年前嘅比賽：「肯定係1999年曼聯贏歐聯、最後幾分鐘連入兩球果場波！」

可能你會話平時喺香港根本無機會聽到John Motson嘅講波，但如果你有打機嘅習慣，其實早就已經聽過佢把聲。事關《EA Sports》出品嘅神級足球遊戲《FIFA》系列，早喺1997年開始已經係用緊佢把靚聲㗎喇，仲一直用到2006年先無再用咋。