過去半年，反送中運動在港島區鬧得熱烘烘，銅鑼灣、灣仔以至金鐘幾乎每月一戰，但同樣位處港島的西環偏偏戰事不多，但一打必然爆發大戰，催淚煙瀰漫民居，處處烽煙四起，全因這區早被標籤成「西環重鎮」。7.21、7.28及8.4三場西環之戰都被列為反送中運動的大型抗爭行動，大批示威者及警員在主流媒體的直播畫面中出現，而有份上街抗警暴的西環街坊卻匿藏於街角默默守護家園。居住西環逾十年、年約40歲的阿超及黃生（化名）均指，一直被視為「藍到發黑」的西環街坊，經歷多場衝突後許多街坊都由藍變黃，及後，只要社區內那裏有警暴，那裏便有街坊抗暴。

記者：林穎嵐 攝影：麥超億（部份由受訪者提供）

「最多西環街坊出嚟抗暴嗰次，應該係第一日大三罷朝早，其實都有記者做直播，但冇咩人知。」11月11日，是為期數日的全港大三罷首日，西環清晨多處有示威者「裝修」藍店包括美心旗下多家食肆及堵路。

當日早上約8時，阿超身處西環薄扶林道港鐵香港大學站出口的一場斯文街坊抗警暴的小「戰役」。他指當時薄扶林道的馬路上，有示威者在堵路期間與藍絲街坊發生衝突，「有個藍絲阿叔去扯女學生口罩，令到有啲準備去返工嘅後生睇唔過眼同佢有啲肢體衝突。」他形容，當時有一名看似上環上班族的男士上前喝止藍絲大叔，直斥他扯學生口罩極為離譜。

「有街坊經過停低，有人拎手機拍攝，亦有人圍觀。」阿超形容現場有近百街坊聚集馬路兩旁，亦有人在馬路旁的寶翠園內離遠指罵，更有正義女街坊上前指斥藍絲大叔打人。「大概15分鐘到開始有交通警到場，後來有街坊喺再遠啲大叫『有警察到』。」他指，警車到場時沒有發出警告聲響，「淨係聽到防暴趟門聲，跟住未舉旗已經聽到嘭、嘭、嘭幾聲啦！」阿超指警方連續發射了約5枚催淚彈，現場逾百名沒有防護裝備的街坊即時四散，有人邊跑邊用手遮鼻指罵警員，「街坊咪鬧佢哋『有冇搞錯！呢度係住宅區呀！』之類。」他指警方發射催淚彈後接着狂發射胡椒球彈，「我都食到成面都係，鼻水口水流晒，根本睇唔到佢喺邊射，風一吹過嚟就聞到好灼熱、好辣嘅味，乸住塊面。」育有一子一女的阿超指，警方發射的催淚彈有兩枚墮落於其女兒就讀學校門口，「嗰時我都冇辦法，係擔心個女，我只可以喺嗰度附近逗留，硬食晒啲煙。」

阿超指當時有多名街坊感到不適，大部份人感到眼部痛楚，「其實係咪可以清路或者用其他方法疏導都得，唔使亂放催淚彈呢？」他指當日警方亂射催淚彈後有逾百家長到場查看學校情況，「我哋都好擔心會唔會影響小朋友，佢哋未必能夠保護自己，學校亦未必有保護設施即時清場，做法唔可以接受！」他指，當日的情景、街坊的怒火幾乎是他居住西環十多年以來鮮有見聞，直言警暴肆虐全港，令師奶、媽媽甚至上班族都奮起抵抗守護家人和家園。

西環區之所以被視為「重地」，無疑是因着該區是中聯辦所在地，長期設有水馬及水炮車坐鎮，其「氣場」令示威者敬而遠之，街坊自然也不敢走近；然而，權力象徵在前，警暴當然亦比其他地區更肆無忌憚。居住於中聯辦附近的黃生指，無故截查學生、亂搜市民物件在該處時有發生，亦曾引起街坊奮起抵抗。他憶述8月初有數名穿校服的學生路經該處遭多名警員截查，「有十幾個街坊好不滿，咪圍鬧啲警察，話『你做咩呀！學生嚟咋喎！放佢啦！』等等。」他指在場人士全是街坊打扮，男女老幼都有，不斷高呼「放人」及以手機拍片記錄。

黃生指，西環街坊群起指罵警察的次數雖不及黃大仙及大埔等地，不過不少街坊在7.21及7.28等大型衝突中亦有站出來守護家園。7月21日，民陣於港島區發起遊行，下午3時起由銅鑼灣出發以終審法院為終點，及至晚上有示威者於遊行結束後繼續向中環及西環方向圍堵中聯辦，當晚警方於該區發射大量催淚彈驅散示威者，造成超過14人受傷，一人情況嚴重。事隔7日，由於警方對7.28「追究上環開槍」遊行發出反對通知書，示威者分批向西環及銅鑼灣進發，警方至晚上在西環中聯辦外的干諾道中狂發催淚彈，造成多人受傷。

「緊係嬲啦，有啲街坊特別係後生嗰啲，企喺旁邊邊用手蓋鼻邊狂鬧警察做咩放催淚彈，有啲鬧佢哋就話『上面小朋友呀！放咩（彈）呀！』……鬧嗰啲（人）真係男女老幼都有，有啲婆婆篤住枴杖都喺度鬧，叫佢哋唔好打啲後生，費事陣間搭地鐵我都俾你打埋呀！」黃生直言，不少中年西環街坊自7月開始紛紛由淺藍變淺黃，難再對警暴視若無睹，「我記得我6月派傳單叫人去參與7.1遊行時，啲師奶叫我叫啲人唔好搞事，但7.21直程喺西環狂放催淚彈，後來真係開始越來越多街坊鬧啲警察，當然佢哋真係好和理非，真係淨係鬧完就算，不過就真係唔鍾意佢哋(警察)囉。」

超哥亦認為，街坊於7月底親眼在西環目擊警暴，不少中年人都因此變成黃絲和理非。「有次和你拖拖到嚟西環，我記得真係所有都係街坊，大家熟口熟面。」他笑言，自從那次「和你拖」活動，西環凝聚了一種黃絲力量，「大家好似變咗相認嘅感覺，見到就會話『咦！你今日都嚟支持呀！』感覺好唔同，原來西環都有一班人會有自己嘅表態。」及至10月4日《禁蒙面法》實施後，他更肯定警暴肆虐的確喚醒了當區街坊，「嗰日夜晚係見到有熟面口嘅街坊出嚟，有啲企喺馬路又或者去集會。」直言許多街坊都是怕警暴在該區發生才出來守護家園。

-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
-----------------------------
【撐學生】
召集有心人 撐學生全年睇《蘋果》
立即按此
-----------------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568