當年今日
關於我們

【家駒冥壽】愛心延續慈善演唱會ViuTV作直播頭炮

蘋果日報 2016/06/09 06:00

演唱會梁詠琪RubberBand灣仔黃貫中側田草蜢鄧健泓直播DearJane周啟生黃家駒盧巧音保良局G.E.M.真的愛你林曉培喜歡你ViuTV家駒....愛心延續慈善演唱會2016福幼基金金屬狂人

ViuTV之前話過計劃直播演唱會,原來聽晚佢哋會有第一炮,就係直播聽晚喺灣仔會展舉行嘅《家駒....愛心延續慈善演唱會2016》,由於聽日係家駒冥壽,買唔到票嘅歌迷可以睇直播懷念家駒。至於聽晚有份參與嘅歌手除咗家駒昔日戰友葉世榮、黃貫中同劉志遠之外,重有G.E.M(鄧紫棋)、梁詠琪(GiGi)、側田、盧巧音、周啟生、草蜢、鄧健泓、林曉培、RubberBand同DearJane等等,由中國3D數碼娛樂、大名娛樂同星際娛樂等主辦,個騷扣除成本之後會全數捐比保良局同福幼基金,聽晚重會有即場捐款熱線,延續家駒嘅善心。

演唱會上,GiGi會同譚芷昀合唱《真的愛你》,G.E.M就會唱《喜歡你》,而阿Paul同世榮就會合唱《金屬狂人》等。講番個騷,ViuTV會喺聽晚8點半播到凌晨12點15分,今日《蘋果》打比ViuTV,公關部王小姐回應話:「係,可以話同步,所有好嘅音樂我們都會努力爭取,為香港觀眾帶嚟更多音樂選擇。」無綫收視愈嚟愈差,而家ViuTV玩埋直播演唱會,相信對大台收視一定構成威脅啦。