【蘋點球壇】法比仔時代兵工廠 同04不敗球季爭幾遠?
阿仙奴尹佩斯法比加斯亨利韋拉伯金
【新增動新聞】
家陣踢緊法甲摩納哥、已經年屆32歲嘅法比加斯,近日受訪突然講到自己9年前離開阿仙奴係迫不得已咁,嫌隊波入面只有佢自己、尹佩斯同拿斯尼係夠班幫球隊爭奪英超錦標,但其他全部都係蛋散咁話。蘋果名家何西同盧卡東尼今日就住呢個話題討論,亦有唔同意見。
何:最大問題係法比加斯本身都未到一級,我認同佢一出道係幾有潛質,但慢慢踢落去,做埋隊長,又唔覺得佢係有魄力可帶到阿仙奴捧英超嘅領袖,起碼喺之後日子都證明,佢去唔到韋拉嗰種高度,有時怪隊友渣,都要諗吓係咪可以將自己睇到咁高......
盧:我會體諒法比加斯嗰種無奈。雖然阿仙奴喺2003/04創造不敗球季嗰陣,佢仲未踢一隊,但話晒見證過韋拉同亨利嗰個年代嘅輝煌,而且當時佢一出道就畀好多人睇好佢可以接棒,之後06年又真係幫過球隊打入歐聯決賽,只係爭一步就可以捧盃,呢啲初出道嘅光輝日子,好難免令佢一開始對兵工廠有憧憬,可惜事與願違。
何:咁講真,除咗RVP同拿斯尼,你覺得兵工廠嗰陣隊波係咪同03/04球季爭好遠?
盧:當然。嗰陣亨利、皮利斯同艾殊利高爾一條左路踢到曉飛咁,中場又有韋拉坐鎮,後面仲有蘇甘保咁穩健嘅中堅。唔好唔記得,仲有一個串連做得好好嘅伯金,自己入到波又交到波畀亨利,我覺得法比仔嗰段時間,都係爭咗一個閱讀球賽能力咁好嘅人,好明顯艾沙維都做唔到伯金嘅功能。
何:但又未算真係唔夠力同嗰陣曼、車一撼,反而有啲唔好彩係隊波成日有球員受傷,好似法比仔離開一季,當時個個大讚嘅華美倫幾乎全季受傷打柴,仲有戴亞比之前兩季其實都好搶眼,點知又係同一問題,最尾呢兩位仁兄都變咗玻璃腳。加上禾確特、韋舒亞都上緊位,如果諗落當時呢班球員嘅質素,唔係好似法比加斯講得咁弱,有時係太好彩,影響成隊波爭標實力。
盧:都認同。不過,補充一點,球員心態都係阿仙奴欠缺霸氣嘅重點,你見法比加斯走後,拿斯尼、基捷基治又走,之後再有尹佩斯、沙格拿,變相大家都成日有種心理係兵工廠家陣攞唔到冠軍,只係可以爭前四,所以雲格畀唔夠球員信心,反而我覺得先係大問題,而呢個亦都係教授之後帶隊一直走下坡嘅原因。
何:都係嗰句,韋拉走後,場上搵唔到一個領袖,法比加斯本身又唔算係呢類人,人哋曼聯當時有朗尼,傑斯同史高斯呢班元老級亦仲喺度,車仔就有泰利、林伯,但阿仙奴真係冇一個係呢類提場或提升士氣嘅人物,只係呢一點已經見到高低,而法比加斯或者都要問自己,點解佢缺乏呢種信心、堅定,家陣仲要將走人怪落球隊度,根本心態上就係想重返巴塞居多,咁樣阿仙奴點會有爭標能力呢?
門將:施捷斯尼
後衞:沙格拿、哥斯尼、佐奴、基捷基治
中場:法比加斯、桑治、韋舒亞
前鋒:禾確特、尹佩斯、拿斯尼
主要後備:法比安斯基、華美倫、伊保爾、戴亞比、路斯基、艾沙維、賓特拿
門將:列文
後衞:羅倫、蘇甘保、高路托尼、艾殊利高爾
中場:龍格保、韋拉、基拔圖施華、皮利斯
前鋒:伯金、亨利
主要後備:史超活泰萊、基昂、施根、柏奴亞、伊度、韋托特、簡奴
-----------------------------
【武漢肺炎】專頁 全民自救 抗疫資訊盡在《蘋果》
--------------------
【匿名港警爆大鑊】
韓國KBS時事節目《時事直擊:香港 被自殺》
一按即睇 --------------------
【撐學生】召集有心人 撐學生全年睇《蘋果》
立即按此 --------------------
《體蘋果》陪你睇波講波
https://www.fb.com/appledailysports
法比加斯時代的阿仙奴與03/04球季其中最大分別,是爭奪榮譽的心態