宏利（945）近日因facebook一條帖文而「爆紅」，有人自稱宏利員工打算畀幾百蚊搵人製作短片，因而被人喪鬧，宏利雖然即時劃清界線，但短期都好難洗得清，可憐佢哋3個月前先至出過一輯網絡宣傳片，被YouTube指為今年首季最出色嘅香港YouTube廣告之一。華華登時想到一句：水能載舟亦能覆舟！

𠵱家網絡短片多如天上繁星，上載兩日已經話out，唔知大家仲記唔記得，3個月前網絡瘋傳一條以《「奇則」上車盤 退休人士安樂窩》為題嘅短片，呢條其實係宏利製作嘅宣傳片，食住當時好多奇則新盤個勢講退休生活。
呢條片累積超過30萬個點擊，以電視收視標準計，一點收視大概7萬人睇，換句話講，條片有4點收視，高過某電視台嘅節目收視喇。

仲要有娛樂性和共鳴

噚日YouTube在港舉行記者會，主要股東Google的香港總經理Dominic Allon講到今年首季最出色嘅香港YouTube廣告，亦特別提到宏利呢輯片。佢大讚，宏利識得網絡營銷新秩序，條片完全唔Sell嘢，反而更着重提供娛樂，咁就成功突圍。
佢又提供咗兩個製作影片嘅秘訣，就係條片一定要可以喺手機度睇，同埋要有共鳴。唔知宏利可否利用呢兩道秘訣力挽狂瀾呢？
講到一條能引起共鳴嘅片，近日麥記搵蔣志光舊曲新詞翻唱《相逢何必曾Big Mac》應該係代表作之一，幾日點擊超過30萬呀。
冇計，時下年輕人主要上網獲取資訊，好多時喺fb睇朋友share嘅廣告片，難怪大家都要各出奇謀。

李華華
mailto:[email protected]