巴塞隆拿周六有驚無險反勝基達菲2:1，取得西甲開季4連勝，下半場入替嘅中場丹尼斯蘇亞雷斯，都有唔少功勞，事關佢62分鐘入波，助巴塞追平1:1，咁啱呢場波係丹尼斯第40場為巴塞上陣，根據轉會協議巴塞要俾70萬鎊（約740萬港元）曼城，好彩拎到3分，巴塞應該俾得開心。

丹尼斯蘇亞雷斯2013年由曼城轉投巴塞，除咗280萬鎊基本轉會費外，每10次上陣，巴塞都要額外俾多70萬鎊曼城，直至100次為止；45分鐘丹尼斯入替恩尼斯達，啱啱係40場上陣，巴塞又要科水。以呢位23歲中場近年不斷進步，預料更獲教練華維迪重用，亦代表曼城好快又有錢收。