滙豐銀行前高層劉智傑（劉sir）好火滾，post咗兩張滙豐月結單喺facebook，炮轟獅子行嘅收費猶如搶劫，諗過打電話畀滙豐副主席王冬勝投訴㖭呀。

事緣今朝劉sir收到份濕濕嘅郵件，話差啲落淚，原因係兩張月結單charge咗佢三筆數，首先係郵寄月結單費用20蚊，然後係銀行確認資料費用（核數用）舊年開始加價到600蚊；另一張月結單就charge佢戶口結餘不足，要畀75蚊嘅費用。

睇番兩張月結單其實都係公司戶口，劉sir同華華講，一個係佢幫一間慈善機構管嘅帳目，近日要由銀行確認資料再畀核數師核數，但估唔到銀行確認資料費用舊年加價五成，「公平咩？！」另一個戶口的確係冇用一段時間，因近年開戶難，佢點都保留住先，但就因為結餘不足2.5萬而要畀75蚊費用。

劉sir話見到呢啲收費就感到相當無言，雖則有啲收費可能會有信函通知，「但成日寄嚟，咩都寄畀你，邊有人睇？」有網友留言，建議佢可以打去金管局搵陳德霖投訴，劉sir話要打畀王冬勝先啱。

不過最後劉sir話：「講下啫，唔會幾百蚊都煩住人。」咁呢筆數點計先，會唔會打畀客戶經理問下？「打乜鬼吖，淨係請人食飯都幾千喇」，而且今次唔係錢嘅問題，亦唔係chok住道氣，而係「嘆息間銀行搞成咁，連舊員工都咁受氣，擔心銀行根本留唔到客，銀行死梗」。

掌握財經生活資訊，即Like「蘋果ATM」fb專頁啦！
http://fb.com/appledailyatm