據田北辰講,香港嘅大學生考呢個試,平均成績唔曳,平均有六分以上,考到八至九分嘅(九分滿分)亦大有人在,不過工程系的學生平時對英文少啲注意,臨急惡補亦好應該。
以往大學畢業,英文程度冇人會懷疑,如今卻要離校前考一次英文試,大家心照嘞。無獨有偶,英文水平下降,非香港獨有現象。學生C嘅中學同學去咗加州讀CSU(加州州立大學,有好多間分校),畢業前一定強逼性要考一個(WST,WritingSkillTest),最難嘅部份係寫一篇五百字文章。學生C啲同學亦係修讀工程、電腦、設計之類,玩電腦玩到識飛,但考WST就肥咗兩次,唔及格就攞唔到大學畢業證書,認真煩,但好難得嘅係,啲學生冇集體抗議,冇人笑CSU噃。
照左丁山話,香港嘅大學生為咗證明自己嘅雙語能力,除咗英文考IELTS之外,母語中文亦應該考一次WST,向CSU看齊。香港學生固然要着重英文,但對中文重視程度唔夠,點會夠競爭力!