《蘋果》曾將「優農良品」推銷手法向大律師陸偉雄求證，他看過講座影片後，直言是「低層次的詐騙手法」，並指事件涉及多宗罪行。

陸偉雄表示，《禁止層壓式計劃條例》主要針對任何人投資，無論產品及服務，都要有一個對等的回報。「講座從來無清楚講到底投資啲錢，係放喺服務或者係物品身上。」指即使是有肉類產品提取，以投資額數以萬元計，根本不是「對等」，「如果話係興建豬場仲慘，依家非洲豬瘟咁流行，如果疫情持續，要殺晒啲豬，投資咁高風險，到底有無解釋過？」

除了涉干犯層壓式罪行外，陸偉雄亦指，每個投資項目，都要得到證監會批准，方可在市面上公開集資，他推斷該計劃很大機會不能獲批，有非法集資之嫌。

他續指，整個項目都在中國發生，「仲慘！如果日後公司清盤，或者有財政有問題，點先可以拎番啲錢，無人知！」屆時可能涉違反欺詐罪。

「依個鴻圖大計差唔多每個星期都有錢收，但只不過係美麗嘅謊言！」陸偉雄指推廣的內容含糊不清，「即使頭兩個月收到錢，都唔代表以後收到錢」。而公司成員曾向記者指「公司由中國軍方開，好放心」，陸偉雄反指「唔見得中國鼓勵軍人去從事民營業務，我又睇唔到軍人養豬，習近平會特別高興。」

陸偉雄坦言整個計劃，「太多漏洞，我覺得（欺騙）證據好強。」最後他稱：「用萬般藉口，用一啲好低層次嘅欺騙手法，我提議大家報警。」根據《禁止層壓式計劃條例》，一經循公訴定罪，可處罰款100萬元及監禁7年。

學者：成個計劃無可能成功

《蘋果》亦就「27種中草藥養豬」、「弱鹼性豬」等向香港高等教育科技學院食品與健康科學學系副教授方麗影求證，她看過「優農良品」的指南，直斥「一派胡言」：「根本無可能work，簡直係亂嚟！廢噏！」

方麗影直指：「隻豬食埋咁多奇怪嘅嘢，有無問題，其實都係一個好大嘅issue」。她引述指南提到「將糞便變化肥、將蟲變成飼料」表示「亂七八糟、 咁搞必死無疑！」怒轟「我覺得成件事都係呃人！」而指南中亦指水溶硅為人體必需品，她沒好氣地說：「嘥氣！唔好玩！」

方麗影解釋，蛋白質為養豬的重要元素，「所以豬嘅飼料要盡量做到蛋白質成份一定要高，中草藥的成份主要是纖維，豬隻只食中草藥根本無辦法轉化成蛋白質，成個計劃係無可能。」

對於講座曾指「偏鹼性豬好食啲，無咁肥」她就指豬的酸鹼值受到多項因素影響，如屠宰過程，「偏鹼性就會深色啲，微酸就會白色」而記者試食的「旺旺豬」，顏色偏白，正與公司所指偏鹼性相反。

本報記者
-----------------------------
7月4日起 《蘋果動新聞》只限升級壹會員閱覽
繼續撐蘋果！