郭羨妮（Sonija）今日喺大埔超級城出席《新地復活創意歷程》活動，即場設計復活蛋。

提到5歲大嘅囡囡Kylie，Sonija指佢好貪靚，2歲時已愛着高踭鞋，Sonija笑住話：「細細隻腳仔就踩入去，喺屋企踏踏踏，o依家都係咁；今日佢學校開派對，我早啲起身同佢整頭，佢自己就化少少妝，不過都係搽潤唇膏，我同佢講唔係跳舞表演，唔使化得咁行，但佢話要用閃粉，仲話我教過佢先搽cream再噴閃粉，呢啲佢完全記住，我諗佢將來可以做我化妝師。」

Kylie將來長大，如果想參加香港小姐呢？Sonija笑謂：「我都有幻想過，如果佢將來想參加，我諗我唔會出名，唔會話俾大家知，因為怕佢壓力大，同埋想俾人有公平嘅感覺，等佢自己去打拼，唔關阿媽事。」好多人都知道囡囡個名喎，Sonija話：「總之我唔會出現啦，淨係喺幕後煲湯。」

Sonija透露其有份參演嘅網劇《我的法則-辦公室篇》將於聽日早上7點喺網上首播，佢喺劇中飾演辦公室嘅女魔頭，仲笑言擔心自己惡得滯。而星期六就到湖南登台，近日練歌練到把聲拆晒，問佢有冇跳舞？Sonija話：「《舞動奇跡》之後都有繼續跳，但o依家冇喇，骨頭碎。」

精選娛聞，喺晒《娛果》
http://fb.com/appledailyent