熱刺射手哈利卡尼喺英格蘭國家隊唔知點解寧舍多嘢做，入波又係靠佢，舊年歐國盃開角球又係靠佢，周六世盃外作客蘇格蘭又多一個任務，就係做隊長啦！由於隊長首選朗尼落選今次國際賽期，其餘隊長人選加利卡希爾同佐敦軒達臣亦似乎各有不足，領隊修夫基周五表示，決定向23歲嘅卡尼委以隊長重任！

修夫基大讚卡尼：「佢嘅心理質素好出色，有極佳球場視野，亦好熱衷擔任領導角色…我哋喺U21合作過，我清楚知道佢嘅心理質素，佢亦渴望成為世上最佳球員之一。」