港交所（388）以過百億收購倫敦金屬交易所（LME），市場除咗關注港交所搞唔搞得掂LME，亦睇緊行政會議成員張震遠有份嘅商品交易所以後點算。商交所暫時好似唔受影響，噚日仲公佈請咗位新嘅業務拓展項目總監Eric Maine。

Maine之前係新加坡交易所嘅商品業務產品開發同管理主管，再之前做過新加坡商品交易所同美國洲際交易所，嚟到香港商交所，佢主要負責管理新產品嘅推出過程。
商交所舊年5月開業，家只係得一公斤黃金期貨同1000金衡盎司白銀期貨合約兩個產品。
之前過去五個交易日，黃金期貨每日只有千幾張合約成交，白銀就每日得幾十張成交，好難用交投暢旺來形容喎！
商交所一直話遲啲推出人民幣期貨產品，港交所又話收購LME可以發展埋內地商品市場，唔知張震遠同港交所主席周松崗平日開完行會會議，會唔會行埋一邊傾吓點合作呢？