韓國男團SuperJunior（SJ）將於後晚喺亞博開騷，崔始源今日就撇甩隊友，率先襲港搵真銀，今午始源現身尖沙嘴出席Helianthus皮具品牌活動，吸引成300粉絲到場。

型爆嘅始源好識做，先後以廣東話、普通話同英語和粉絲打招呼，一出場就用廣東話話：「大家好，好耐冇見，我係你哋嘅崔始源，好掛住你哋，我每天都想你哋。」冧到全場粉絲嘩聲四起。

台上司儀問到始源對香港嘅印象時，始源賣口乖話：「好靚女，好想你哋，好有禮貌。」不過唔知係唔係始源最叻只係講「靚女」呢兩個字，所以佢就連揹住個袋時，佢都話個袋好靚女，笑爆全場。之後又風騷話帶埋啲粉絲去新店睇吓，揹住個袋擺型男甫士時，又得戚話自己好靚仔，真係冇辦法，認真風趣。

之後大會邀請三位粉絲上台玩遊戲時，始源又細心地問佢哋：「食飯未？小心啲，慢慢。」噓寒問暖嘅程度真係係女都冧鬼死，最後佢又搭住粉絲膊頭逐一同佢哋影合照，跟住又拿起粉絲嘅手機同佢哋玩自拍，見到粉絲個個都用LG同三星時，就大讚佢哋用韓國貨，唔用iPhone，多謝佢哋支持韓國。臨走前始源感激粉絲陪伴佢度過SJ九周年嘅大日子，真係好鬼窩心。

事後始源接受傳媒訪問時承認，經理人同香港朋友教佢講廣東話，經理人仲每日教佢講廣東話同普通話。問到係唔係想趁機識香港女仔時，始源就鬼馬話：「不能說的秘密，歌迷和粉絲聽到後會非常喜歡，所以每日學一點。」原來此行始源係同媽咪一齊嚟港，不過媽媽去咗觀光，但佢因為要綵排個唱，所以就冇時間陪伴母親四圍睇。

隊友晟敏將於下月結婚，問佢有咩表示時，始源就扮暈話：「我不知道，我有禮物，但不能說的秘密。」至於幾時輪到自己結婚，始源就指住粉絲話：「如果我有（指女友），我怎麼辦？」做完傳媒訪問後，始源又繼續發功冧粉絲，走均三面台，逐一同現場粉絲影大合照。