巨聲幫陳國峰（Penny）昨日小登科，跟拍拖8年的圈外女友黃思雅拉埋天窗。一對新人昨日在九龍塘進行簽紙註冊儀式，一班藝人好友陳凱琳（Grace）、林盛斌（Bob）、吳業坤、謝東閔等都有到場觀禮。
Grace撇甩男友鄭嘉穎，單拖到場，她說折現送利是給新郎最實際。Grace見友人結婚，也有憧憬自己披嫁衣做新娘子，她說：「結婚都有同佢（鄭嘉穎）傾過，大家都有共識，不過就唔需要每次都向大家交代。」
有傳嘉穎一直都過唔到Grace雙親那一關，但有指他在農曆新年，親自上門向世伯伯母拜年，似有破冰迹象，Grace笑着稱：「爹哋媽咪都好鍾意佢，因為覺得佢好有禮貌，父母見到我哋傾偈同相處都好放心，相處得好好！」

陳庭欣拍拖到場

婚禮上，新郎新娘就做齊交換戒指、揭頭紗、合巹交杯、切蛋糕和咀嘴環節，但新郎哥因太緊張，過程中出現不少蝦碌事件，他與新娘交換戒指時竟然拿錯自己的戒指，試行樓梯時又險些仆低。Penny受訪時表示：「今日只做註冊，11月先擺酒，但我已經好緊張，緊張到急屎。所以頭先我要不斷唱歌紓緩吓心情！」對於何時造人，Penny笑笑口說：「應該趕唔切生猴B啦！不過可以嘅話，我想生個仔先，所以會問阿Bob意見，佢做嗰啲我就唔會做，因為佢生3個都係女！」
另外，一直未有承認拍拖的港姐冠軍陳庭欣和港男翟威廉，昨日不避嫌孖實到場。相反林欣彤和舊愛羅孝勇，雖然同場但就企到離行離列，全程沒有交流，顯得十分避忌！
採訪：張俊銘
攝影：陳志嵐