本月底係中銀香港百年誕辰，各路單位自然全力催谷，搬出部門鎮店家檔，最後衝刺為銀行助興。噚日就由中銀個人金融及財富管理部助理總經理張穎思（Winnie），介紹佢哋即將推出，重1公斤嘅限量版「百年中銀紀念金條」。

聽聞呢件超磅金條，用今日金價計，價值大約超過36萬元，呢排肥仔金試射導彈，金價應該睇升唔睇跌，限量版金條應該有收藏價值。

但華華覺得最搶鏡嘅，喺Winnie面前陳列嘅中銀經典貴金屬珍品，好多都係中銀香港控股未重組成立（2001年）之前，喺中銀集團港澳管理處13行年代，成員行之一寶生銀行所打造嘅鎮山之寶，包括1994年出產嘅「金鵬手錶」、80年代嘅「龍鳳金牌」等，雖然年代久遠，但件件成色都已經係4條9。

講起寶生，不得不提資深金融界人士、人稱「堅叔」嘅馮志堅，佢1966年加入寶生，後來做到寶生副董事長，佢專長黃金外滙交易，係金銀業貿易場永遠名譽會長，昔日佢都有向傳媒介紹過「金鵬手錶」。

1998亞洲金融風暴，政府搵「四大御貓」入市落盤殺鱷，時任中銀集團證券副董事長嘅堅叔，就係入市當日大清早，獲金管局前總裁任志剛邀約赴英雄宴嘅御貓代表之一嘞。

蘋果財經，關心你飯碗
http://fb.com/appledailyatm