現年30歲的混血女模MandyLieu前年搭上已婚嘅澳門賭業猛人周焯華（洗米華），去年5月為對方生咗B女。MandyLieu一直到倫敦隱居，去年底終於按捺不住以高姿態返港，並同洗米華上演一幕「世紀一拖」，成功觸怒正印陳慧玲(Heidi)神經，令大婆心死決意離婚。

如今洗米華同MandyLieu似無後顧之憂，可以盡情地周遊列國，繼兩人先後被人影到去日本、韓國、新加坡及西班牙等地旅行後，今日又有讀者陳先生透過本報「爆相爆片」，提供兩張洗米華同Mandy去泰國布吉嘅相。

陳先生表示噚日下午一時許，見到洗米華同Mandy喺布吉CentralFestival行街，但身邊未有保鑣及BB女。進擊的Mandy產後極速回復窈窕身段，以一身夏日look，身上粉橙色花花圖案吊帶短裙，與身穿背心短褲嘅男友洗米華一齊戴情侶Cap帽及太陽眼鏡。陳先生指兩人好甜蜜，一齊食窩夫雪糕，全程好開心有講有笑，離開時更手拖手再到附近商場行逛。

據悉，洗米華每年卅晚都會與爸爸、家姐及子女等一家人出埠旅行，今年亦不例外，但相信搞緊離婚嘅Heidi唔會同行，所以洗米華要趁新年前陪Mandy。