大陸女星范冰冰嘅《巴清傳奇》同周迅、霍建華嘅《如懿傳》，由開拍到o依家一直都係外界嘅焦點，日前有大陸消息傳出，《巴清傳奇》成功撼低《如懿傳》，可以喺4月19日搶先喺衛視台播出，被廣電總局昅到實嘅《如懿傳》上映無期。

點知事情出現峰迴路轉嘅轉變，因為高雲翔被指喺澳洲涉嫌性侵一名36歲女子，結果係…同高雲翔有關嘅作品全都禁播，當中就包括《巴清傳奇》，另外《阿那亞戀情》、《哪吒與楊戩》、《北上廣的四季沐歌》、《不婚》、《探戈》與《驚天岳雷》六套作品都無一倖免。

不過，《巴清傳奇》冇得播唔代表《如懿傳》會重見天日，據台灣《蘋果》報道，中國官方已拍版定案，全面禁播《巴清傳奇》和《如懿傳》。本來愛奇藝影片網站今晚喺美國納斯達克（NASDAQ）股票交易所上市，不過有傳佢哋擁有呢7套劇嘅播放權，唔知可唔可以播出！

據講《如懿傳》最大嘅問題係「主軸偏差」，即係政治不正確啲fd，劇中宮廷鬥爭劇情唔符合大中華文化精神，亦都有傳最近習近平連任，修憲之後更可以無限期連任……宮廷鬥爭題材就太敏感喇。

雖然台灣衛視中文台同愛奇藝台灣站已經買咗《如懿傳》播映權，咁廣電總局係管唔到台灣會唔會播，不過為咗有最後翻身機會，可能有關方面寧願Hold住先、丟淡一年半載，絕對唔會擅自將母帶交出，換句話說，台灣同大陸嘅觀眾暫時都冇機會睇到呢部套劇。

精選娛聞，喺晒《娛果》
http://fb.com/appledailyent