鍾舒漫（Sherman）及妹妹鍾舒祺噚晚喺沙田出席活動，Sherman表示已經唔係第一次喺沙田做亮燈活動，加上以前中學時係田徑隊，成日喺沙田練跑。

問到聖誕節點過？佢話：「要返內地工作，過往都係因為工作，冇出街睇燈飾，要寓工作睇燈飾。」咁係咪冇得同男友吳浩康過？佢話：「未知，但九成都唔得。」在旁鍾舒祺就話：「你有我陪你已經好足夠。」

問到送乜禮物畀男友？Sherman表示要保持神秘，所以唔講住，不過佢就話Deep早兩日已送禮畀佢：「係一部隨身（彈鋼琴）keyboard，自己恨咗好耐，不過佢送畀我時候發生小插曲，我做緊舞台劇，只係憑記憶講地址畀佢知，但啲字寫錯咗，令佢搵咗好耐，佢放低份禮後就匆匆走咗，不過收到時好sweet。」

此外，有傳容祖兒及陳奕迅今年唔去頒獎禮？佢話：「都有聽過，不過未證實，如果冇Eason及祖兒會好可惜，去親頒獎禮想睇佢哋表演。」