暑假期間，日本各大台都爭住搞馬拉松式音樂會，富士電視台就趁今日係當地公眾假期，舉行長達11個鐘嘅《FNS歌之夏祭》，由早上開始唱到今晚，約100組嘉賓輪流演出，包括嵐、平井堅、西野加奈、倖田來未、華原朋美同埋被指好事近嘅柴咲幸等，而奉子成婚嘅鈴木亞美都會現身，不過SMAP就因為解散風波無緣亮相。

今年活動以一班女團打頭陣，包括AKB48、HKT48、NMB48、SKE48、乃木坂46、櫸坂46、Morning娘、℃-ute、桃草都難得合作，於戶外泳池又跳又唱，成班偶像唔介意濕身上陣，仲落埋水浸住演出，已宣佈將會退出AKB嘅小嶋陽菜，就瞓上吹氣浮床歎住凍飲搶鏡。