到香港會參加晚宴，於是着番套西裝打領呔，熄埋手機先至行入去，碰到最近被田北俊議員欽點「秘密武器」，一貫親英愛美崇法嘅才子T，於是同佢打招呼：「喂才子T，過兩招秘笈過嚟，點樣先至可以做特首嘅秘密武器。」才子T唔嬲噃，反而笑口吟吟咁話：「田議員要上番一堂通識教育課，學吓香港報紙點樣運作。凡係大報，都有學識淵博，下筆千言，倚馬可待嘅文膽，全職負責寫社論，幾時輪到我啲咁嘅爬格子動物寫社論？其次，我去慣巴黎羅浮宮，倫敦NationalGallery，紐約Metropolitan，對甚麼西九龍文娛藝術區呢件未完工物體，邊度會有興趣去評論吖。」

才子T有才子脾氣，唔識佢嘅好容易被佢嚇親，以為呢位才子來自撒哈拉沙漠（戈壁唔夠大），滿身沙塵滾滾。好彩識得佢耐，知晒佢啲嘻笑怒罵作風，而且不打誑語，一定言之有物，言必有據，如果曾特首真的搵佢做秘密武器，都唔知會唔會與佢合得來，因為特首本人亦好有稜角也。
才子T原來寫文、上電視、做電台、去旅行之餘，都重有時間剩，可以為港大學生開課，教一科通識教育，課程叫做「大國民」。聽見呢個名，左丁山以為佢講授著名電影，奧遜威爾斯（OrsonWelles）之經典之作《CitizenKane》（中文譯名為大國民），才子T嘅電影評論非常到家，到大學講大電影大國民，一啲都唔奇吖。才子T話：「唔係講電影，係講點樣做一個大國民，真正嘅Citizen，既有文化歷史根源，又有世界視野嘅現代國民，古今中外都講，不拘一格。」
呢科通識教育好有趣味性噃，才子T話學生多到課室冇位坐，向隅者眾。香港大學話明係英語大學，才子T按照過去英國人傳統，用英語授課，一啲學生要求佢講廣東話，才子T唔制，話要保留英國人留番畀香港大學嘅優良傳統喎。